राष्ट्रिय स्वतन्त्र पार्टी (रास्वपा) का महामन्त्री एवं सांसद विपिन आचार्यले सरुवा वोर्ड गठन गर्न माग गरेका छन् । आफू राजनीतिमा आएपछि सबैभन्दा बढी दबाब बढुवा र सरुवाकै आएको भन्दै आफ्ना आफन्त र साथीभाइलाई पनि आफूले पार्टीको चुनावी बाचापत्रको बुँदा नम्बर–८ देखाउने गरेको बताए । उनले पार्टीको बाचापत्रको बुँदा देखाएर पठाउने गरे पनि सरुवा बोर्ड गठन नभएका कारण त्यसले व्यक्तिगत रूपमै असर गर्ने चिन्ता जाहेर गरे ।
“अझ हाम्रो आफ्नै बाचापत्रको बुँदा नम्बर ८ देखाएर स्वायत्त सरुवा बोर्ड गठन हुन्छ जसले विधि र पूर्वानुमानमा सरुवा बढुवा गर्छ भनेको छु,” आचार्यले अगाडि भने “सरकारलाई यो बोर्ड चाँडै गठन गर्न आग्रह छ । नत्र यो दसैँमा आफ्नै आफन्त र इष्टमित्रले आशिर्वाद नदेलान् भन्ने पीर छ ।” उनले नातागोता र नजिकका मानिसहरूबाटै हुने स्वार्थप्रेरित दबाबलाई रोक्न सरकारले तत्काल स्वायत्त सरुवा बोर्ड गठन गर्नुपर्ने माग गरेका हुन्।
बिज्ञापन
उनले अगाडि थपे “म राजनीतिमा आएपछि सबैभन्दा बढी दबाब आएको सरुवा र बढुवाको नै हो । अरु बेला सुशासन र पारदर्शिताको कुरा गर्ने मेरा आफ्नै आफन्त र साथीहरू मेरो घरमा नातावाद र कृपावाद खोज्दै सरुवाका लागि आउनुहुन्छ । मैले सबै जनालाई हाम्रो सरकारमा सरुवा बढुवामा विधि र पद्धतिबाहेक अरु केही पनि हुँदैन भनसुन चल्दैन भन्ने गरेको छु ।” उनले ठट्टा र कटाक्षको शैलीमा अगाडि थपे, ‘यदि सरुवा वोर्डको व्यवस्था नभए आउँदो दसैँमा आफ्नै इष्टमित्रबाट टीका र आशीर्वाद पाउनु त कता हो कता, काम भएन भनेर सराप पो पाइन्छ कि भन्ने डर छ। यो सरापबाट मलाई बचाइदिनुपर्यो सरकार।’
